(1943, Bakı) – Azərbaycanın xalq rəssamı (2006). Ə. Əzimzadə adına Azərbaycan Dövlət Rəssamlıq Məktəbini və Azərbaycan Dövlət İncəsənət İnstitutunu bitirmişdir. “Göyərçin” jurnalının bədii redaktoru, “Azərbaycan dünyası” beynəlxalq qalereyasının rəhbəri, Bakı Xətai sənət mərkəzi nəzdindəki miniatür qalereyasının bədii rəhbəri, Azərbaycan Rəssamlar İttifaqının “miniatür və kitab qrafikası” bölməsinin rəhbəri olmuşdur. Əsərləri Azərbaycan Milli İncəsənət Muzeyində, Moskva Dövlət Şərq Xalqları İncəsənət Muzeyində, Azərbaycan Dövlət Rəsm Qalereyasında, həmçinin şəxsi kolleksiyalarda saxlanılır. Bakı, Moskva, Tokio, Berlin şəhərlərində fərdi sərgiləri olmuşdur. Yaradıcılığında dəfələrlə M. Ə. Sabir poeziyasına müraciət etmişdir. Sabirin anadan olmasının 150 illiyi münasibətilə çap olunan “Hophopnamə”yə verdiyi tərtibat və bu nəşrin bütün mənalarda çəkisini artıran qırx yeni rəsm özünəməxsus bədii həlli, bu vaxta qədər bu yöndə etdiklərinin uğurlu sintezi kimi qəbul olunur. “Hophopnamə”nin yeni nəşrinə M. Ə. Sabirin bir neçə portreti də daxil edilmişdir. Şairin ənənəvi xüsusiyyətlərini cəmləşdirən bu portretləri Azərbaycan təsviri sənətində şairə həsr olunan ən uğurlu əsərlərdən hesab etmək olar. Azərbaycan Respublikası Prezidentinin fərdi təqaüdçüsüdür.
Əd.: Z. Əliyev “Arif Hüseynov”, Bakı, “Şərq-Qərb”, 2014