(15.3.1897, Şamaxı – 5.12.1988, Bakı ) – Azərbaycan aktyoru. Azərbaycan SSR xalq artisti (1940). 1910-12 illərdə Bakıda H.Әrəblinskinin rəhbərlik etdiyi həvəskar dram dərnəyində, sonralar “Nicat” və “Səfa” cəmiyyətlərinin, Z. və Ü.Hacıbəyov qardaşlarının teatr truppalarında çıxış etmiş, burada Sadıq xan (“Ağa Məhəmməd şah Qacar”, Ә. B. Haqverdiyev), şah Təhmas (“Nadir şah”, N. Nərimanov), Rza bəy, Soltan bəy, Nofəl (“O olmasın, bu olsun”, “Arşın mal alan”, “Leyli və Məcnun”, Ü.Hacıbəyov) və s. rolları oynamışdır. 1921-33 illərdə Bakı Azad Tənqid-Təbliğ Teatrının (sonralar Bakı Türk İşçi Teatrı) və bir müddət Azərbaycan Dram Teatrının aktyoru olmuş, bir sıra yadda qalan səhnə obrazları yaratmışdır:

Satin (“Həyatın dibində”, M Qorki), İsgəndər, Rüstəm bəy (“Ölülər”, “Anamın kitabı”, C. Məmmədquluzadə), Balaş (“Sevil”, C. Cabbarlı), Məmmədcəfər (“Yanğın”, H.Nəzərli və S.Rüstəm) və b. 1933 ildən Azərbaycan Dövlət Dram Teatrının aktyoru olmuşdur. Gəraybəylinin yaradıcılığında güclü dramatik, komik səpkili səhnə obrazları mühüm yer tutur. Әsas rolları: Məşədi Hüseyn (“Həyat”, M. İbrahimov), Altun bəy, Salamov (“Od gəlini”, “1905 ildə”, C. Cabbarlı), naçalnik (“Qaçaq Nəbi”, S. Rüstəm), Koba (“Xanlar”, S. Vurğun), bələdiyyə rəisi (“Müfəttiş”, N. Qoqol), Mindilli, Әliqulu (“Nişanlı qız”, “Әliqulu evlənir”, S. Rəhman) və b. Gəraybəyli “Azərbaycanfilm”-in istehsal etdiyi “Sevil” (1929), “Fətəli xan” (1947), “Sevimli mahnı” (1956), “Qızmar günəş altında” (1957), “O olmasın, bu olsun” (1958) və s. filmlərdə çəkilmişdir. Azərbaycan SSR Ali Sovetinin (6 çağırış) deputatı olmuşdur. Lenin ordeni, Oktyabr İnqilabı və Qırmızı Әmək Bayrağı ordenləri, həmçinin medallarla təltif edilmişdir.

Əd.: ASE, VI cild, Bakı, 1982, s. 86