(? – ?) – 14 əsr Azərbaycan şairi. Şirvanşah Kavusun dəvəti ilə Şirvana köçmüş, saray şairi olmuşdur. Ədəbi irsindən qalan farsca “Fərhadnamə” (1369) poemasının əlyazma nüsxəsi İstanbulda Ayasofiya muzeyi kitabxanasındadır. Nizami ənənələrinin davam və inkişaf etdirilməsi baxımından “Fərhadnamə”nin əhəmiyyəti böyükdür. Əsər 2 hissədən ibarətdir. “Hekayəti Fərhad” və “Hekayəti-Fərhad-Şirin”. Müəllif şifahi xalq ədəbiyyatına əsaslanaraq, İran şahı Xosrovu deyil, memar Fərhadı poemanın baş qəhrəmanı seçmişdir. A.Ə.-nin “Xosrov və Şirin” mövzusuna gətirdiyi bu yenilik sonralar özbək şairi Ə.Nəvainin “Fərhad və Şirin” poemasında inkişaf etdirilmişdir. Əsər bədii təsvir vasitələrinin orijinallığı ilə seçilir. “Fərhadnamə”dəki hadisələr Azərb. mühiti ilə bağlıdır. Əsərdə Şamaxı, Bakı memarlıq abidələrindən də bəhs edilir.
Əd.: Azərbaycan Milli Ensiklopediyası 2 cild, Bakı, 2010, s.37