(? – 1538) – Şirvanşah [1535/36 – 38]. Əmisi II Xəlilüllahın ölümündən sonra hakimyyətə çıxarılmışdı. Kiçik yaşlı olduğundan dövləti əslində vəkil Hüseyn bəyin başçılığı ilə Şirvan zadəganları idarə edirdi. Özünü Şirvanşah Şeyxşahın oğlu Məhəmməd adlandıran bir qələndər (dərviş) 1537 ildə Şirvanda hakimiyyət uğrunda mübarizəyə başladı.

Qələndər Salyan və Mahmudabad şəhərlərini tutub Şamaxıya hücum etdi. Şahrux və Hüseyn bəy Buğurt qalasına çəkildilər. Lakin tezliklə üsyan yatırıldı. Şirvanı çoxdan Səfəvilər dövlətinə birləşdirməyə çalışan Səfəvi hökmdarı I Təhmasib 1538 ildə Şirvana qoşun göndərdi, Buğurt qalasında bir neçə ay müqavimət göstərdikdən sonra təslim olan Şahrux Təbrizə aparıldı və edam edildi. Şahruxun ölümü ilə Şirvanşahlar (Dərbəndilər) sülaləsinə rəsmən son qoyuldu və Şirvan Səfəvilər dövlətinə birləşdirildi.

Əd.: ASE, Bakı, 1987, s.478