(? – 1372/73) – Şirvanşah [1345 – 1372/73]. Keyqubadın oğlu. 14 əsrin 30 illərindən ölkəni atasının adından idarə edirdi. Şirvanın müstəqilliyi uğrunda mübarizədə Çobani Məlik Əşrəfə ciddi müqavimət göstərən Kavus 1348 ildə onun vassallığını qəbul etməyə məcbur oldu. Qızıl Orda xanı Canı bəylə Məlik Əşrəf əleyhinə ittifaq bağlayan Kavus 1356/57 ildə qızılordalıların Azərbaycana hücumu zamanı onlara hərbi yardım göstərdi. Əşrəfin ölümündən sonra Kavus iki dəfə Azərbaycanın cənubuna yürüş edib Şirvana xeyli əhali köçürdü. 1366/67 ildə Cəlairi Şeyx Üveysin qoşunları ilə döyüşdə məğlub olan Kavus Təbrizə gətirildi; iki ay həbsdə saxlandıqdan sonra azad edilib Cəlairilərin vassalı kimi yenidən Şirvana hakim təyin olundu.
Əd.: ASE, V cild, Bakı, 1981, s.202