Şamaxı r-nu Həmyəli i.ə.d.-də kənd. Pirsaat çayı sahilində, Cabanı yaylasının cənub yamaclarındadır. Əhalisi 510 nəfərdir (2009), 91 təsərrüfatı var. Əhalisi əsasən maldarlıq və əkinçiliklə məşğuldur.

1886 il əhalinin siyahıya alınması sənədlərində Şamaxı qəzası Qəbiristan sahəsindəki Şalbaş kənd icmasına daxil olan Çaylı Baxışbəyli adlı kənd (23 ailə, 150 nəfər əhali) qeydə alınmışdır. Vaxtı ilə Səbəl düzündə Pirsaat çayının sahilində Baxışbəyin mülkündə yaşamış əhali Baxışbəyin Cabanı yaylasındakı mülkündə məskunlaşmışdır. Əvvəllər çay sahilində yaşayaraq buraya gəldiklərindən Çaylı adlandırılmışdır.

Əd.: N.Bəndəliyev “Dağlıq Şirvanın toponimləri”, Bakı, “Elm”, 2009, s.34