Şeyx İbrahim, İbrahim Dərbəndi (təqr.1352-1417) – Azərbaycan dövlət xadimi, Şirvanşah [1382-1417], Dərbəndilər sülaləsinin banisi. Teymurla Qızıl Orda xanı Toxtamış arasındakı mübarizədən istifadə edərək Şirvanın möhkəmləndirilməsi siyasəti yürüdən I İbrahim Teymurilərə yaxınlaşmaq istəyirdi. Teymurun Qarabağa hücumu zamanı Teymurilərin vassallığını qəbul etdi. Bunun müqabilində o, Dərbənd keçidini Qızıl Ordadan qorumalı idi. Teymurun ölümündən sonra Azərbaycan torpaqlarını hakimiyyəti altında birləşdirməyə çalışırdı. Teymuri hökmdarı Ömər Şirvana hücum edərkən (1405) Şəki hakimi Sidi Əhməd, Gəncə hakimi Yarəhməd, Ərdəbil hakimi Bəstam Çakir və gürcü çarı VII Georgi ilə ittifaq bağlayıb Kür çayı sahilində Teymuriləri məğlub etdi.

I İbrahimin siyasəti nəticəsində Dərbənd, Gəncə, Qarabağın çox hissəsi və s. ərazilər Şirvana birləşdirildi. I İbrahim Teymurilərlə Cəlairilər və Qaraqoyunlular arasındakı çəkişmələrdən istifadə edərək 1406 ildə heç bir müqavimətə rast gəlmədən Təbrizə daxil oldu. Lakin Qara Yusifin və Cəlairi sultanı Əhmədin Təbrizə döndüyünü eşidərək şəhəri tərk etdi. Şəki hakimi Sidi Əhməd və Kaxeti çarı Konstantinlə ittifaq bağalayan I İbrahim 1412 ilin sonlarında Kür çayı sahilindəki vuruşmada Qaraqoyunlulara məğlub oldu. I İbrahim, Şirvan zadəganları və Konstantin əsir alındı. Konstantin üç yüz gürcü knyazı ilə birlikdə öldürüldü. Təbrizə aparılan I İbrahim, bir qədərdən sonra ona rəğbət bəsləyən Təbriz tacirlərinin və əyanlarının xahişi və Qara Yusifin xəzinəsinə 1200 tümənlik mal verilməsi müqabilində azad edildi. Qara Yusifin vassallığını qəbul etmək şərti ilə 1413 ilin yazında Şirvana qayıtdı. I İbrahimin hakimiyyəti dövründə ölkənin təsərrüfatı nisbətən dirçəlmiş, sənətkarlıq, ticarət, incəsənət, memarlıq və s. inkişaf etmişdi.

Əd.: ASE, IV cild, Bakı, 1980, s.357