İlk orta əsr abidəsi. Şamaxı ş. 15 km cənubda yerləşir. Qırlıq dağının şimal ətəyində yerləşən bu abidə 5-6 hektar sahəni əhatə edir. Yaşayış yeri cənubdan Qırlıq dağı, şərqdən Alakol dərəsi, şimal və şimal-qərbdən İrəvan dərəsi ilə sərhədlənir. İrəvan dərəsinin sağ tərəfində Möhrətəpə adlı yerdə çiy kərpicdən tikilmiş bürcün qalığı vardır. Dairəvi formada hörülmüş bürc gözətçi məntəqəsi rolunu oynamışdır.

Yaşayış yerinin ərazisindəki üzüm sahəsi şumlanarkən su tüngü üzə çıxarılmışdır. Buna əsaslanaraq demək olar ki, Qırlıq dağının yamacında yerləşən bulaq suyu yaşayış yerinə gil tünglərlə çəkilmişdir. Dağ Bağırlı kəndinin sakinləri tərəfindən təsərrüfat işləri zamanı abidənin ərazisində əhəng daşından tikilmiş dördkünc bina qalıqları, şüşə qırıntıları, şirli və şirsiz dulusçuluq məmulatı, mis pullar və s. materiallar aşkara çıxarılmışdır. Yaşayış yerindən aşkar olunmuş maddi-mədəniyyət nümunələrinin müqayisəli təhlili göstərir ki, abidədə həyat 2 əsrdən başlayıb, 13-14 əsrlərə qədər davam etmişdir. Abidənin qərb və şərq tərəfindən orta əsr ticarət yolları keçir. Abidənin geniş sahəni əhatə etməsi, əlverişli təbii-coğrafi mövqeyə malik olması, yaşayış binalarının qalıqları, qədim ticarət yolları üzərində yerləşməsi və buradan tapılan sənətkarlıq nümunələri Gümüşlünün ilk orta əsr şəhər tipli yaşayış yeri olduğu haqda fikir söyləməyə imkan verir.

Əd.: N.Xasayev “Dağətəyi Şirvanın ilk orta əsr arxeoloji abidələri”, Bakı, “Nafta-Press”, 1998, s.34