(12.1.1913, Şamaxı – 12.6.1997, Bakı) – Azərbaycan geoloqu və petroloqu, geologiya-mineralogiya e.d. (1961), professor (1966). Azərbaycan Respublikasının əməkdar elm xadimi (1991). 1938 ildə Azərbaycan Sənaye İnstitutunu bitirmişdir. 1945-88 illərdə həmin institutda pedaqoji fəaliyyət göstərmişdir. 1950-54 illərdə Azərbaycan SSR Geologiya İdarəsinin rəisi işləmiş, 1954 ildən Azərbaycan SSR EA-nın Geologiya İnstitutunda çalışmışdır. Tədqiqatları petrologiya, paleovulkanologiya, metallogeniya və radiogeoxronologiya sahəsindədir. Mezozoy vulkanizminin təzahürü qanunauyğunluqlarını, onların dərinlik fasiyalarını və formasion mənsubiyyətini müəyyən etmişdir. Tədqiqatlarının nəticələri əsasında Kiçik Qafqaz və Kür depressiyaları meqazonalarının struktur-formasiya rayonlaşdırılması həyata keçirilmişdir. Filiz və qeyri-filiz yataqlarının axtarışı və kəşfıyyatı üçün əsas olan bir sıra irimiqyaslı geoloji xəritələrin müəlliflərindən biri, 220-dən çox elmi əsərin, o cümlədən 7 monoqrafıyanın müəllifıdir.
Əd.: Azərbaycan Milli Ensiklopediyası, I cild, Bakı, 2009, s.37

(29.1.1926, Şamaxı – 31.3.1980, Novosibirsk; Moskvada dəfn edilmişdir) – sirk artisti, jonqlyor. Azərbaycan SSR xalq artisti (1977). Dövlət Sirk Sənəti Məktəbini bitirmişdir (1942, Moskva). Görkəmli sovet jonqlyorlarından olan Abdullayev 30 ildən artıq bu janrda fəaliyyət göstərmişdir. Abdullayevin jonqlyor sənəti virtuozluğu, orijinallığı, milli özünəməxsusluğu və ekssentrik elementləri ilə fərqlənirdi.

(18.1.1940, Bakı) – Azərbaycan musiqişünas-alimi, sənətşünaslıq doktoru (2005), professor (2004). Azərbaycan Dövlət Konservatoriyasını bitirmişdir. Tədqiqatları əsasən milli çalğı alətlərimizin inkişaf tarixinin öyrənilməsi, quruluş, səslənmə və istifadə xüsusiyyətlərinin araşdırılması, onların türk məkanında oxşar alətlərlə müqayisəsi və eləcə də gələcək inkişaf yolları ilə əlaqədardır.

(16.5.1951, Şamaxı ş.) – Azərbaycan filoloqu, filologiya elmləri doktoru (2007), professor (2012). Bakı Dövlət Universitetinin şərqşünaslıq fakültəsini bitirmişdir. BDU-nun Azərbaycan dilçiliyi kafedrasının müdiridir (2009 ildən).

(7.9.1946, Bakı) – Azərbaycan musiqişünası, filosof, fəlsəfə elmləri doktoru (1990), professor (1992). Azərbaycan Dövlət Konservatoriyasını bitirmişdir. Bakı Musiqi Akademiyasının prorektorudur (1990 ildən). Azərbaycan və dünya musiqisinin fəlsəfi problemlərinə və Azərbaycan bəstəkarlarının yaradıcılığına dair bir sıra əsərlərin müəllifidir. Öz elmi-nəzəri konsepsiyalarında muğamların və folklor musiqisinin fəlsəfi mahiyyyətinə əsaslanır.

Ağa Məsih Məhəmməd oğlu Şirvani (1687-1765), – Azərbaycan şairi. Şamaxı şəhərinin yaxınlığındakı Dədəgünəş kəndində doğulmuşdur.

(1898, Şamaxı – 28.2.1956, Bakı) – Azərbaycan tibb alimi, tibb e.d. (1935), professor (1938), Azərbaycan SSR əməkdar həkimi (1942). Azərbaycan Dövlət Universitetinin tibb fakültəsini bitirmişdir (1924).

Ağəli bəy Әfəndizadə (1856, Şamaxı – 1918, Şamaxı) – Azərbaycan şairi. 19 yüzillikdə Şamaxıda fəaliyyət göstərmiş şairlər məclisi olan “Beyt üs-səfa”nın üzvü olmuşdur. Qəzəllərində Füzuli ədəbi məktəbinin güclü təsiri duyulur.

İsrafilbəyli Ağakərim Ağaisrafil oğlu (4.12.1948, Şamaxı r-nunun Qaladərəsi k.) – xanəndə. Şirvan muğam məktəbinin yetişdirdiyi, öz dəst-xətti ilə seçilən sənətkarlardandır.