ƏFRİDUN İBN III Mənuçöhr
(?-1160) – Şirvanşah [1160]. Kəsranilər sülaləsindən idi. Mənuçöhr 1160 ildə öldükdən sonra Şirvanşahlar taxtına çox qısa müddətdə onun oğlu Əfridun çıxmışdır.
ƏHLİMANOV Ramiz Mirağa oğlu
(1.5.1949, Şamaxı ş.) – Azərbaycan coğrafiyaşünası, coğrafiya elmləri üzrə fəlsəfə doktoru (1980). Bakı Dövlət Universiteti geodeziya və kartoqrafiya kafedrasının dosentidir. BDU-nu bitirmişdir.
ƏHMƏDBƏYOV Zivər bəy Gəray bəy oğlu
(1873, Şamaxı – 16.2.1925, Bakı) – alı təhsilli ilk azərbaycanlı memar, rəssam. Azərbaycan Xalq Cümhuriyyəti dövründə Bakı şəhərinin baş memarı. Peterburq Mülki Mühəndislər İnstitutunu bitirdikdən (1902) sonra Bakı quberniya idarəsinin İnşaat şöbəsində, Bakı şəhər idarəsində memar işləmişdir.
ƏHMƏDOV Fuad Məhəmmədəli oğlu
(20.8.1949 Şamaxı r-nunun Çaylı k. – 10.5.2004, Bakı) – solist-vokalist. Azərbaycan Dövlət Konservatoriyasını bitirmişdir. Təhsil illərində Azərbaycan Dövlət Filarmoniyasının xor kopellasında vokalist kimi fəaliyyət gostərmişdir.
ƏHMƏDOV Sədrəddin Babaş oğlu
(1.7.1923, Şamaxı r-nunun Quşçu k. – 25.3.2012, orada) – əmək qabaqcılı, Sosialist Əməyi Qəhrəmanı (1984), əməkdar üzüm ustası. İkinci Dünya müharibəsinin iştirakçısıdır. Mozdokdan Avstriyaya qədər şərəfli döyüş yolu keçmişdir.
ƏHMƏDOV Şirzad Soltan oğlu
(20.12.1950, Şamaxı r-nunun. Göylər k. – 28.03.2018) – tarixçi, arxeoloq, tarix üzrə fəlsəfə doktoru (1992). Azərbaycan Dövlət Pedaqoji Universitetini bitirmişdir (1979). Azərbaycan MEA Arxeologiya və Etnoqrafiya İnstitutunun aparıcı elmi işçisidir.
ƏHMƏDOVA Lamiə Şirzad qızı
(25.6.1982, Bakı) – tarixçi-arxeoloq, tarix üzrə fəlsəfə doktoru (2014). Azərbaycan Dövlət Pedaqoji Universitetinin tarix fakültəsini bakalavr, Sumqayıt Dövlət Universitetini magistr pilləsi üzrə bitirmişdir. Azərbaycan MEA A.A.Bakıxanov adına Tarix İnstitutunda laborant, Arxeologiya və Etnoqrafiya İnstitutunda böyük laborant, kiçik elmi işçi vəzifələrində çalışmışdır.
ƏLƏKBƏROV Xosrov Mürsəl oğlu
(1970, Şamaxı r-nunun Şəhriyar q. – 23.12.1993) – Qarabağ müharibəsi şəhidi.
ƏLƏSGƏROV Rasim Əlmusa oğlu
(1947, Şamaxı r-nunun Məlhəm k.) – Azərbaycan musiqiçisi, balaban ifaçısı, Azərbaycan Respublikasının əməkdar mədəniyyət işçisi (1989). Babası Ələsgər kişi öz dövrünün məşhur balaban ifaçısı olmuşdur.
ƏLİ ŞİRVANİ
Əli ibn Məhəmməd ibn Əbdül (? – ?) – heykəltəraş. 12-13 əsrlərdə yaşamışdır. Düzəltdiyi heyvan fiqurları dünyanın bir çox muzelərini bəzəmişdir. Tuncdan düzəltdiyi “balasını əmizdirən inək” formasındakı su qabını 1206 ildə tamamlamışdır. Fiqur Sankt-Peterburq şəhərindəki “Ermitaj” muzeyində saxlanır.