Əhmədov Cəfər Namiq Kamal oğlu (16.8.1950) Bakı – aktyor, Azərbaycan Respublikasının xalq artisti (2013). Azərbaycan Dövlət İncəsənət İnstitutunu bitirmişdir. 1972 ildən Azərbaycan Gənc Tamaşaçılar Teatrında aktyor işləyən Cəfər Əhmədov aşağıdakı rolları oynamışdır: Rəcəb (“Şirinbala bal yığır”, S.Qədirzadə), Elçi (“Bir parça Vətən”, F.Sadıq), Qasid (“Rüstəm və Söhrab”, İ.Coşqun), Aparıcı (“Şəhidlər”, B.Vahabzadə), Uçitel Həsənov (“Danabaş kəndinin məktəbi”, C.Məmmədquluzadə), Qaçay bəy (“Qonşu qonşu olsa, kor qız ərə gedər”, R.Əfəndiyev) və s. C.Əhmədov 1996 ildən Azərbaycan Akademik Milli Dram Teatrında çalışır və teatrın səhnəsində bu rolları oynamışdır: Eynşteyn (“Ah,Paris…Paris!..” Elçin), II Tiqran (“Pompeyin Qafqaza yürüşü”, N.Həsənzadə), Ədhəm Tağıyev (“Dəlilər və ağıllılar”, İ.Əfəndiyev), Ədəbi işçi (“Mənim sevimli dəlim”, Elçin), Dost (“Mənim ərim dəlidir”, Elçin), Vəzir Mirzə Həbib (“Lənkəran xanının vəziri”, M.F.Axundov), Xəlil (“Poçt şöbəsində xəyal”, Elçin), Kamran Qızılsəs (“Köhnə ev”, Ə.Əmirli), Qulaməli (“Bu dünyanın adamları”, Hidayət), Gülməyən Adam (“Hərənin öz payı”, X.Qoca), Şeyx Əhməd (“Ölülər”, C.Məmmədquluzadə), Şahzadə (“Xurşidbanu Nətavan”, İ.Əfəndiyev). Aktyor həmçinin, “Qız atası” (Yarik), “Anamın kitabı” (Rüstəm), “Duel” (Əziz), “Yurd yeri” (Sədrəddin) teletamaşalarında oynamışdır. Prezident təqaüdçüsüdür (2014 ildən).
Məlumat www.shamakhi-encyclopedia.az saytından götürülüb.
