Babayev Məmmədağa Ağaxan oğlu (1933, Şamaxı r-nunun Cəyirli k. – 22.11.1977, Şamaxı) – Azərbaycan aşığı, Şirvan aşıq məktəbinin tanınmış nümayəndələrindəndir. Azərbaycan Dövlət İncəsənət İnstitutunu bitirmişdir. Aşıq havaları ilə yanaşı, muğamları da məharətlə ifa etmişdir. Radionun qızıl fondunda çoxlu lent yazısı vardır. Aşıqların I qurultayının nümayəndəsi olmaqla yanaşı, bir çox festivalların iştirakçısı və laureatı olmuş, “SSRİ-nin əlaçı mədəniyyət işçisi” döş nişanı ilə təltif edilmişdir. Uzun illər Şamaxıda “İncə tellər” aşıqlar ansamblına rəhbərlik etmişdir. Şamaxıda mərkəzi küçələrdən biri aşığın adını daşıyır.
Əd.: S.Qəniyev “Şirvanlı Aşıq Məmmədağa – sənət və yaradıcılıq dünyası”, Bakı, CBS, 2014