Noyabrın 9-da “Şamaxı ensiklopediyası”nın ofisində Redaksiya Heyətinin üzvü, filologiya üzrə fəlsəfə doktoru Firudin Qurbansoyla görüş oldu.

Ensiklopediyanın yaradıcı heyətinin rəhbəri, siyasi elmlər üzrə fəlsəfə doktoru, əməkdar jurnalist Fuad Babayev Firudin Qurbansoyu rəhbərlik etdiyi kollektiv adından salamladı və ötən iki il ərzində shamakhi-encyclopedia.az saytına əlavə edilən materiallar barədə məlumat verdi. F.Babayev gələcəkdə ensiklopediyanın yeniləşdirilmiş və təkmilləşdirilmiş nəşrinin çap edilmə imkanları ilə bağlı təəssüratlarını söylədi.

Firudin Qurbansoy “Şamaxı ensiklopediyası”nı özünüdərk baxımından bölgə üçün əvəzsiz nəşr kimi dəyərləndirdi və shamakhi-encyclopedia.az saytında aparılan işlərin vacibliyini vurğuladı.  F.Qurbansoy imkan daxilində saytdakı materialların təkmilləşdirilməsinin və həm redaksiya heyəti üzvləri, həm də yaradıcı heyət tərəfindən yeni məqalələr yazılmasının zəruriliyini qeyd etdi.

Görüşdə son dövrlərdə Şamaxı haqqında nəşr edilmiş yeni kitablar müzakirə olundu, İmadəddin Nəsimi, Mirzə Ələkbər Sabir yaradıcılığının bəzi cəhətləri araşdırıldı.

Görüşdə Redaksiya Heyətinin daha bir üzvü, pedaqogika üzrə fəlsəfə doktoru Dəyanət Musayev də iştirak edirdi.