(1192, Şamaxı – 1305, Təbriz) – Azərbaycan şairi. Mədrəsə təhsili almış, orta əsr poetikasını, məntiq, astronomiya və fəlsəfəsini öyrənmişdi. Şirvanşahlar sarayında yaşamış, Şərq ölkələrinə səyahətə çıxmış, Luristan atabəyi Yusif şaha qəsidələr ithaf etmişdi. Zülfüqar Şirvaninin öz əsərlərində 6 dildə, o cümlədən Azərbaycan dilində yazdığına işarə vardır.

Lakin hələlik fars dilində şeirlərindən ibarət 2 divanı məlumdur (biri Saltıkov- Şedrin adına Dövlət Kütləvi Kitabxanasında (Sankt-Peterburq), digəri isə Britaniya muzeyindədir (fotosurətini 1934 ildə E. Eduardis nəşr etdirmişdir)). Zülfüqar Şirvaninin yaradıcılığı və dünyagörüşü ziddiyyətli olmuşdur. Hökmdarların mədhi ilə yanaşı, yaradıcılığında zəmanədən şikayət, ölkədəki özbaşınalıqdan doğan məyusluq və ümidsizlik motivləri də nəzərə çarpır. Dünyagorüşünə sufilik ideyaları ciddi təsir göstərmişdir. Şeirlərində real gözəlin və məhəbbətin tərənnümü ilə barabər, dini-mistik meyllər də əks olunmuşdur.

Əd.: ASE, IV cild, Bakı, 1980, s.349-350